ەلباسىنىڭ « ۇلى دالانىڭ جەتى قىرى» ماقالاسىندا تاريحي سانانى جاڭعىرتۋدىڭ نەگىزگى باسىمدىقتارى كورسەتىلگەن. بۇگىندە ەلىمىز بويىنشا وسى يگى باستامالاردى جۇزەگە اسىرۋ جۇمىستارى قارقىندى جۇرگىزىلۋدە. بۇل رەتتە, ەلباسىنىڭ سەنىمدى تىرەگى رەتىندە «نۇر وتان» پارتياسى دا بەلسەندى ارەكەت ەتىپ, ناقتى ىستەردى قولعا الدى. اتاپ ايتقاندا, پارتيا جاس اقىن-جازۋشىلار اراسىندا « ۇلى دالا» رەسپۋبليكالىق شىعارماشىلىق بايقاۋىن وتكىزبەك. بۇل جونىندە بۇگىن پارتيا توراعاسىنىڭ ءبىرىنشى ورىنباسارى ماۋلەن اشىمباەۆ ورتالىق كوممۋنيكاتسيالار قىزمەتىندە وتكەن ارنايى بريفينگتە مالىمدەدى.
اتالعان ءىس-شاراعا «نۇر وتان» پارتياسى توراعاسىنىڭ ءبىرىنشى ورىنباسارىمەن بىرگە بەلگىلى جازۋشى, دراماتۋرگ, قوعام قايراتكەرى تولەن ابدىك, پۋبليتسيست, پارلامەنت ءماجىلىسىنىڭ دەپۋتاتى ساۋىتبەك ابدراحمانوۆ جانە قازاقستان جازۋشىلار وداعىنىڭ سەكرەتاريات مۇشەسى نەسىپبەك ايت قاتىستى.
العاش بولىپ ءسوز العان «نۇر وتان» پارتياسى توراعاسىنىڭ ءبىرىنشى ورىنباسارى ەلباسى ماقالاسىنىڭ ءمانى مەن ماڭىزىنا توقتالىپ ءوتتى. ول بۇل ماقالانىڭ ۇلت تاريحىن تانۋدىڭ جاڭا كەزەڭىن باستاپ بەرگەنىن جانە ءبىزدىڭ الەمدىك وركەنيەت پەن جاھاندىق دامۋعا قوسقان ۇلەسىمىزدى قايتادان زەردەلەپ, دۇنيەجۇزىنە جاڭاشا دارىپتەۋگە ۇندەيتىنىن ايتتى.
– ەلباسىنىڭ « ۇلى دالانىڭ جەتى قىرى» ماقالاسى كوپقىرلى ءارى اۋقىمدى تاريحىمىزدى دۇرىس ءتۇسىنىپ, قابىلداۋعا شاقىرادى. سوندىقتان ونداعى باسىمدىقتاردى جۇزەگە اسىرۋعا مەملەكەت باسشىسىنىڭ سەنىمدى تىرەگى رەتىندە «نۇر وتان» پارتياسى دا تىكەلەي اتسالىساتىن بولادى. وسى باعىتتاعى جوبالارىمىزدىڭ ءبىرى جاس اقىن-جازۋشىلارعا ارنالعان « ۇلى دالا» شىعارماشىلىق بايقاۋى. بۇل بايقاۋدىڭ فورماتى مەن ماڭىزىن جازۋشىلار وداعىمەن پىسىقتاپ, الدىن الا تالقىلادىق. الداعى ۋاقىتتا جاس قالامگەرلەرىمىز وسى بايقاۋ ارقىلى ەلباسىنىڭ ماقالاسىندا ايتىلعان قۇندىلىقتار مەن يدەيالاردى دارىپتەۋگە جانە ولاردى جۇزەگە اسىرۋعا ءوز ۇلەستەرىن قوسادى دەپ سەنەمىز, – دەدى ماۋلەن اشىمباەۆ.
ءوز كەزەگىندە جازۋشى تولەن ابدىك ەلباسى پارتياسىنىڭ ادەبيەتكە كوڭىل بولگەنى قالامگەرلەر قاۋىمىن ەرەكشە قۋانىشقا بولەگەنىن ايتتى.
– وسىنداي بايقاۋ ۇيىمداستىرىپ, ادەبيەتتىڭ دامۋىنا, جاستاردىڭ كورىنۋىنە مۇمكىندىك جاساۋ ءبىز ءۇشىن جاقسى جاڭالىق بولدى. وسى رەتتە بايقاۋعا قاتىساتىن شىعارمالار ناۋقانشىلىققا بوي الدىرماي, تەرەڭ زەرتتەلىپ, ساپالى جازىلسا دەگەن تىلەگىمدى جەتكىزگىم كەلەدى, – دەدى تولەن ابدىك.
ال مۇنداي بايقاۋلاردىڭ ادەبيەتكە بەرەرى مول ەكەنىن ايتقان ءماجىلىس دەپۋتاتى ساۋىتبەك ابدراحمانوۆ وسى جايىندا ناقتى مىسال دا كەلتىردى.
– وتكەن عاسىردىڭ 60-70 جىلدارىنا دەيىن قازاق ادەبيەتىندەگى بالالار ادەبيەتى كەنجەلەپ قالعان بولاتىن. بەردىبەك سوقباقپاەۆ, ساپارعالي بەگالين, مۇزافار الىمباەۆ سياقتى قاداۋ-قاداۋ تۇلعالار قالام تارتاتىن. ال 70-ءشى جىلدارى «جالىن» الماناحى جارىق كوردى. كەيىن «جالىن» باسپاسى اشىلىپ, جىل سايىن بالالار مەن جاستارعا ارنالعان شىعارمالارعا بايقاۋ جاريالاۋ داستۇرگە اينالدى. سونىڭ ارقاسىندا اينالاسى جيىرما شاقتى جىلدىڭ ىشىندە قازاقتىڭ مىقتى بالالار پروزاسى مەن بالالار پوەزياسى قالىپتاستى. بۇل ەشقاشان ۇمىتىلمايتىن ەرەكشە جاعداي. سوندىقتان «نۇر وتان» پارتياسىنىڭ باستاماسىمەن قولعا الىنعان ءىستىڭ مىندەتتى تۇردە جاقسى جەمىس بەرەتىنىنە سەنىم بىلدىرەمىن, – دەدى ساۋىتبەك ابدراحمانوۆ.
بايقاۋدىڭ باستى ماقساتى – رۋحاني جاڭعىرۋ يدەيالارى مەن قۇندىلىقتارىن دارىپتەيتىن قازىرگى زامانعى قازاقستاندىق ادەبيەتتى دامىتۋ جانە سوعان قولداۋ كورسەتۋ. سونداي-اق ءوز شىعارمالارىندا ەلىمىزدىڭ رۋحاني جاڭعىرۋى مەن دامۋىن سۋرەتتەيتىن, قازىرگى زامانعى شىندىقتى تۇسىنۋگە جانە قازاقستاندىقتاردىڭ دۇنيەتانىمىن قالىپتاستىرۋعا ىقپال ەتەتىن تالانتتى جاس ادەبيەتشىلەردى انىقتاپ, ولاردىڭ ەڭبەگىنە لايىقتى باعا بەرۋ دە كوزدەلىپ وتىر.
بايقاۋعا 18 بەن 40 جاس ارالىعىنداعى قالامگەرلەر قاتىسا الادى. قاتىسۋشىلاردىڭ جۇمىستارى 2018 جىلدىڭ 28 قاراشاسى مەن 2019 جىلدىڭ 15 قاڭتارى ارالىعىندا قابىلدانادى. ناتيجەسىندە «پروزا», «پوەزيا», «دراماتۋرگيا, كوركەم فيلمدەر مەن تەلەسەريالدار ستسەناريى», «پۋبليتسيستيكا» جانە «بالالارعا ارنالعان شىعارمالار» سياقتى بەس بىردەي اتالىم بويىنشا جەڭىمپازدار مەن جۇلدەگەرلەر انىقتالماق. ءار اتالىم بويىنشا جەڭىمپاز بەن ەكىنشى جانە ءۇشىنشى ورىن العان قاتىسۋشىعا قوماقتى قارجىلاي سىيلىق تاعايىندالعان. ناقتى ايتقاندا, ءار اتالىمنىڭ جەڭىمپازىنا – 1,5 ميلليون, 2-ورىن يەگەرلەرىنە – 750 مىڭ, ال 3-ورىن العان قاتىسۋشىلارعا 500 مىڭ تەڭگەدەن بەرىلەدى.
بايقاۋدىڭ باسقا دا شارتتارى تۋرالى پارتيانىڭ رەسمي سايتى مەن بۇقارالىق اقپارات قۇرالدارىندا جاريالانعان ەرەجەدە تولىق باياندالعان.